ز
ز
بوست النهاردة انا هعرضه فى صورة سؤال وجواب وكأنه حوار بين صحفية مثلا وطالبة طب والطالبة دى تبقى حضرتى يلا علشان ماحدش يزعل أنا ها بتوع طب لا انا بأكد بتوع طب لا .انا مااقدرش اقول عنهم اى شئ (بخاف انا حيث ان الجبن سيد الاخلاق والجرى كل الجدعنة)انا بتكلم عن نفسى بس.وان شاء الله فى مرة من المرات هتكلم بجد عن كليتنا المصونة بس دلوقتى اسيبكم مع البوست ده بس الضحك بصوت او من غير صوت ممنوع بس تبتسموا انا بنبه اهو
ها دخلت طب ليه؟
والله العظيم دخلت مع اللى داخلين لقتهم داخلين قلت طيب بقى ايه ادخل انا كمان
ها وبعد ماتتخرجى هتفتحى عيادة فين ؟
هفتح عيادة فى البدروم او ممكن فوق فى الروف علشان تبقى معفية من الضرايب والرسوم وتبقى حاجة كوووووووووول
وهتشترطى ايه فى المرضى بتوعك ؟
هعلق يافطة كبيرة مكتوبة عليها الدخول مقتصر على القصيرين ممنوع الدخول لاى حد فوق الميه وستين علشان مايحصليش احراج شديد(حد طويل احنا مش ناقصين)
وايه مبدأك فى الطب؟
ياخبر ياخبر ودى عايزة سؤال طبعا طبعا if the cause is unknown اديله يااخويا كورتيزون
وايه الحاجات اللى دخلتى الكلية بيها وهتطلعى من غيرها؟
العقل طبعا كنت داخلة بعقلى تمام بقى دلوقتى ربع مخ ونص بتنجان والربع اللى فاضل بقى بيعانى من ال زهايمر والنسيان
ايه اكتر موقف حصلك ومش ممكن تنسيه؟
كانوا فى يوم فى معمل الكيميا وكنت لابسه البالطو وعاملين بنعمل تجارب وفجأة حد كب مية النار عليا (H2SO4وربنا ستر والبالطو اتحرق مع شوية خدوشات واهدار بسيط فى الارواح (اللبس طبعا مش انا و رجعت البيت كنت مشردة )
ها وايه رأيك فى مدة الكلية حساها طويلة شوية؟
ياحبيبتى احنا بنقعد فى الكلية دى زيادة عن اللزوم احنا بنعفن فيها
احكيلى ايه اكتر موقف اثر فيكى طيب ؟
آآآآآآآآآه ياانا بتفكرينى ليه بصى ياحبيبتى يوم امتحان الفارما العملى ونظرا لانى منحوسة وقعت فى تجربة الفيران وياريته كان فار واحد ولا اتنين دول تلاتة بشنبات(نياه نياه) وانا اول لما شفتهم جتلى صدمة عصبية ونفسية وكان مطلوب منى انى احقنهم ولازم يناموا يعنى يناموا وغصب عن شنباتى كنت لازم اعمل التجربة دول اربعين درجة ياناس وانا احاول مع اول واحد وده ابدا اشممه مافيش احقنه مافيش حاولت مع التانى وقطع الجلفز واتعضيت (آآآآآآآآآآآه ياانا )والتالت بقى قلت كفاية حرام كفاية اللى كان والدكتورة جت ولقتنى كده صعبت عليها والله يلا ايام ربنا مايرجعها
وايه اكتر يوم بتتمنيه؟
يوم مااتخرج من الكلية ويقولولى كفارة يابنتى اتخرجتى ياسلااااااااااااااااااااااااااااام ده حلم ياناس
ومازالت حضرتى تغنى امتى اتخرج امتى امتى امتى
وقد ملت الصحفية من هذه الطالبة المفترية ( حضرتى)وصعبت عليها وقالتلها روحى يابنتى ربنا يكرمك وتخرجى من التأبيدة ويستر على المرضى من ايدك ( اللهم آمين)
بزمتك دي مش حلوة دي
ردحذفدي تحفه ياه يا همستي ضحكتيني بشكل
واكتر حاجه بتاعت الفيران مع انك صعبتي عليا اوي
الا سبوكي من غير ابرة اذاي بعد العضه دي
والموقف بتاع مياه النار لا حول ولا قوة الا بالله ايه يا بنتي انتي كل حودثك خطيرة كدا
طب الحمد لله انك بتعدي منها علي خير
الحمد لله الحمد لله يا رب انك بتحمي البنوته الي احلي من العسل والسكر دي
ربنا يوفقك يا قلبي
سلام يا قمر
ههههههههههههه
ردحذفيابنتى ربنا يعينكم والله
الحمد لله على كلية التجارة الى انا فيها
وماله تجارة تجارة بس اتخرج بمخى سليم ههههههههه
هههههههههههه و الله مافيش احلى من ان الواحد يتصبح ببوست زي ده
ردحذفطبعا فهماكي و حاسه بيكي يا ختشي بس خلاص هانت و حتفرج ان شاء الله
تعرفي ان لو حد سألني السؤال الاول كنت حجاوب كده برضو؟ ههههههههههه بس بجد صعبتي عليا فيران؟؟؟ اخرتها فيران؟؟؟ لالا احنا هنا بنتعامل بس مع الضفادع بنزبطها بعد ما يكونو نيموها هما مالناش دعوه احنا ياااااااااااه فكرتيني بالايام السوداء لما كان كل واحد لازم يجيب ضفدعه بنفسه يالهوي يالهوي عاللي جرالي ههههههههههههه
كفايه ذكريات لحد هنا احسن شويه و حعيط
سلام يا حلوه
فتاه حالمه
ردحذفميرسى يأحلى وارق بنوتة فى كل الدنيا ربنا يخليكى ليا ومش اتحرم منك ابدا
وآه ياقمر بقاسى انا كتير والله بس برضه قردة اهو عمر الشقى بقى ياقمر
يلا الحمد لله وبعدين انا ماكملتليكيش باقى المغامرات ان شاء الله لما نتكلم عالميل هحكيلك
وميرسى حبيبتى ونورتينى وسامحينى بوست نص نص
mohamed ghalia
ردحذفمحمد ميرسى ليك بجد
وبعدين ضحكت ليه احنا مش قلنا نبتسم بس ههههههههههه
وبعدين انا كده هحقد عليكم عالفكرة
بتخرجوا بخكم سليم وبس اربع سنين لالا انا كده هحقد بجدهههههههههه
Meme
ردحذفاهلا بأحلى دكتورة فى كل الدنيا وحشتينى ياقمر والله
حبيبتى انا كده هحقد عالفكرة يعنى انتم كنتم بتتعاملوا مع ضفادع بس وكمان بيثبتوها اهئ اهئ اهئ ياعينى علينا ده احنا كنا بنتعامل معاها من الاول خالص من اول التخدير اقصد من اول مابنتقل البنية لحد مانطلع nerve
او muscle
بس صعبتى عليا والله للما قلتى كنتم لازم تجيبوا ضفادع بنفسكم احنا كانوا بيجيبلونا ضفادع وفيران الحقيقة الناس دى مش حرمنا من حاجة خالص ههههههههههههه
ونورتى يااحلى دكتورة فى كل الدنيا وتسلملى الضحكة الحلوة ياقمر
ههههههههههه
ردحذفحلو اوي مثل الكورتيزون دا
ازيك يا دوكه
د. محمد رضــــا .. هل تراني
ردحذفاهلا بدوكتر محمد وشاعرنا الكبير
وانا سعيدة انها عجبتك يادوك وحلوة دوكة دى على الاقل احسن من نص دوك هههههههههه
والله حلو موضوع الكورتيزون هيودونا فى داهية الناس دى ههههه
وحضرتك نورت البلوج يادوكتر